આજે તો મની પ્લાન્ટથી મોટાભાગે સૌ કોઈ પરિચત જ છે. આર્થિક સમૃદ્ધિ મેળવવા માટે ઘણાં બધાં લોકો આ મની પ્લાન્ટને તેમના ઘરમાં લગાવતા હોય છે. કદાચ તમે પણ લગાવ્યો હશે. પણ, શું તમને એમ લાગે છે કે આ મની પ્લાન્ટ તમને માત્ર આર્થિક સમૃદ્ધિ જ પ્રદાન કરે છે ? વાસ્તવમાં ધનલાભ સિવાય પણ આ મની પ્લાન્ટ અનેકવિધ લાભની પ્રાપ્તિ કરાવનારો છે !
તમને કદાચ નવાઈ લાગશે, પણ, તમારા લગ્નજીવનને મધુર બનાવવાથી લઈ આ મની પ્લાન્ટ તમને જાહેર જીવનમાં સન્માનની પણ પ્રાપ્તિ કરાવી શકે છે ! આવો, આજે તે જ વિશે વિગતે માહિતી મેળવીએ.
મની પ્લાન્ટના લાભ
⦁ માન્યતા અનુસાર મની પ્લાન્ટ ઘરની આર્થિક તંગી દૂર કરવામાં સહાયરૂપ બને છે. કહે છે કે જે ઘરમાં મની પ્લાન્ટ હોય ત્યાં દેવી લક્ષ્મીની કૃપા સદૈવ વરસતી જ રહે છે. અને તેને લીધે વ્યક્તિને ધનલાભ થાય છે.
⦁ વાસ્તુશાસ્ત્ર અનુસાર જે ઘરના મુખ્ય દરવાજાની બંન્ને બાજુ બારી હોય છે, તેવાં ઘરમાં હંમેશા પૈસાની તંગી રહે છે. જો, તમારા ઘરમાં પણ એવું હોય, તો આ વાસ્તુદોષને દૂર કરવા માટે જરૂરથી ત્યાં મની પ્લાન્ટ લગાવવો જોઈએ. કહે છે કે તેનાથી આપના ઘરના તમામ પ્રકારના આર્થિક સંકટ દૂર થઈ જશે અને ઘરમાં સમૃદ્ધિનું આગમન થશે !
⦁ જો ઘરમાં તિજોરીની પાસે મની પ્લાન્ટ લગાવવામાં આવે તો તે અત્યંત ફળદાયી બને છે. અને ઘરમાં ખૂબ જ ઝડપથી સમૃદ્ધિનું આગમન થાય છે.
⦁ ઘરના બગીચામાં મની પ્લાન્ટ લગાવવાથી આર્થિક પરેશાનીઓ દૂર થઈ જાય છે.
⦁ એક માન્યતા અનુસાર મની પ્લાન્ટ જે ઘરમાં હોય, તે ઘરમાં સંબંધો વધુ મધુર બને છે અને તેને લીધે ઘરમાં ખુશીઓનું આગમન થાય છે.
⦁ જો મની પ્લાન્ટને ઘરના ડ્રોઇંગ રૂમમાં લગાવવામાં આવ્યો હોય, તો કહે છે કે તેનાથી ઘરમાં આવતા દરેક લોકો સાથે યજમાનના સંબંધો ખૂબ જ સારા રહે છે. અને એટલે જ વ્યક્તિના માન-સન્માનમાં પણ વૃદ્ધિ થાય છે.
⦁ લગ્નજીવનની મધુરતા માટે પણ મની પ્લાન્ટને ખૂબ જ શુભ માનવામાં આવે છે.
⦁ જે વ્યક્તિને ખૂબ જ તણાવ રહેતો હોય, તે વ્યક્તિ જો મની પ્લાન્ટના પત્તાઓને ધ્યાનથી જુએ છે, તો તે તણાવથી મુક્ત થઈ જાય છે.
⦁ કહે છે કે જેમ-જેમ મની પ્લાન્ટ વધતો જાય છે, તેમ-તેમ ઘરના આર્થિક લાભ તેમજ સુખ-શાંતિમાં સતત વધારો થવા લાગે છે.
(નોંધ: અહીં આપવામાં આવેલી જાણકારી ધાર્મિક આસ્થાઓ અને લોક માન્યતાઓ પર આધારિત છે, જેનો કોઈ વૈજ્ઞાનિક આધાર નથી. સામાન્ય જનરૂચિને ધ્યાનમાં રાખીને આ લેખને અહીં પ્રસ્તુત કરવામાં આવ્યો છે.)
