નવરાત્રિ હવે થોડા દિવસમાં શરુ થવાની છે. 15 ઓક્ટોબરથી 9 દિવસ માતાજીની પૂજા કરવામાં આવશે. ગુજરાતમાં તો ગરબાની રાહ જોવાતી હોય છે. વર્ષમાં 2 મુખ્ય નવરાત્રી આવે છે એક શારદીય નવરાત્રી અને બીજી ચૈત્રી નવરાત્રી. ચૈત્રી નવરાત્રીમાં માતાજીની પૂજાનું ખૂબ મહત્વ છે, જ્યારે શારદીય નવરાત્રીમાં માતાજીની પૂજા સાથે ગરબાનું પણ વધુ મહત્વ છે.
માતાજીની પૂજા સૌ કોઈ કરતા હશે પરંતુ માતાજીના રુપ, તેમના અસ્ત્ર-શસ્ત્ર વિશે બહું ઓછા લોકો જાણતા હશે. આવો જાણીએ શું કહે છે શાસ્ત્ર.
આ દેવતાઓએ માતા દુર્ગાને શસ્ત્રો પ્રદાન કર્યા હતા
શંખ- માર્કંડેય પુરાણ અનુસાર, વરુણ દેવે મા દુર્ગાના હાથમાં શંખ આપ્યો હતો. એવું કહેવાય છે કે મા દુર્ગાના શંખના અવાજથી ઘણા રાક્ષસોનો નાશ થયો હતો. માન્યતા અનુસાર શંખનો અવાજ વાતાવરણમાં રહેલી નકારાત્મક ઉર્જાનો નાશ કરે છે.
ધનુષ અને તીર- માર્કંડેય પુરાણ અનુસાર, સૂર્ય દેવ અને પવન દેવે મા દુર્ગાને ધનુષ અને બાણ આપ્યાં હતાં. આ બંને શસ્ત્રોને ઉર્જાનું પ્રતિક માનવામાં આવે છે.
ભાલો- અગ્નિદેવે માતા દુર્ગાના હાથમાં ભાલો આપ્યો હતો. જે ઉગ્ર શક્તિ અને શુભતાનું પ્રતિક માનવામાં આવે છે.
વજ્ર- ભગવાન ઈન્દ્રની કૃપાથી મા દુર્ગાના હાથમાં વજ્ર પ્રાપ્ત થયું હતું. એટલે કે ઇન્દ્રદેવે પોતે જ માતા દુર્ગાને વજ્ર પ્રદાન કર્યું હતું. વજ્રને મજબૂત ઈચ્છાશક્તિનું પ્રતિક માનવામાં આવે છે. એવું કહેવાય છે કે મા દુર્ગા ભક્તોને આત્મવિશ્વાસ અને ઇચ્છાશક્તિ પ્રદાન કરે છે.
ત્રિશુળ- પૌરાણિક ગ્રંથો અનુસાર, ભગવાન શિવે માતા દુર્ગાને ત્રિશુળ ભેટમાં આપ્યું હતું. એવું કહેવામાં આવે છે કે માતાના હાથમાં ત્રિશૂળના ત્રણ કિનારી સત્વ, રજસ અને તમસના ગુણોનું પ્રતીક છે. માતા દુર્ગાએ આ ત્રણેયને સંતુલિત કરીને સમગ્ર સૃષ્ટિનું નિયંત્રણ કર્યું હતું. તેમજ માતાએ આ ત્રિશૂળ વડે મહિષાસુર નામના રાક્ષસનો વધ કર્યો હતો.
તલવાર- દંતકથા અનુસાર, ભગવાન ગણેશે મા દુર્ગાને તલવાર ભેટમાં આપી હતી. એવું માનવામાં આવે છે કે મા દુર્ગાની તલવારની ધાર બુદ્ધિની તીક્ષ્ણતાનું પ્રતીક છે, જ્યારે તલવારની ચમક જ્ઞાનનું પ્રતિનિધિત્વ કરે છે.
કુહાડી- મા દુર્ગાના હાથમાં કુહાડી ભગવાન વિશ્વકર્માએ આપી હતી. કુહાડીને દુષ્ટતા સામે લડવાનું પ્રતીક માનવામાં આવે છે.
(નોંધ: અહીં આપવામાં આવેલી માહિતી ધાર્મિક માન્યતાઓ અને જાહેર માન્યતાઓ પર આધારિત છે, તેના માટે કોઈ વૈજ્ઞાનિક પુરાવા નથી. સામાન્ય જનતાના હિતને ધ્યાનમાં રાખીને અહીં રજૂ કરવામાં આવી છે.)